Q.Resiyar Khagra ni Rosamung?B.A 3rd semester kokborok major paper:-6 ni
4. Rosamung
Paithago o kokno sathai kwlaio, chini bubagrarokni thani baithangni hano twiwi aswkkhai mokol kaimung naikolmung tongo, abo borokni himthani thang-phai khwlaithani tei samung-humung khwlaimani bisingtwino sijagwi tongo. Abo simiya ha ari khochorjak tongmano bahaikhe teisa phuwarwi mannai a wansukmungbo bubagrarokni salbrumni wansukmungo tongwi tongo. Aboni bagwino Tripura kaisa yokjak haste tongphuru eba bubagra Bir Bikram Kishore Manikya Debbarmani ha twidulwi tongmani jorao Tripura hani ari belaikhe kuwar tongmani. Abono rwgwi naikhe, tabukni hasteni arino karwi Bangladesh hao khopjak Kumilla, Sylhet, Shrihatta, Bramanbariya akohai kwbangma thai jora chini Tripura ha ari khopjak tongmani. Sanathangkhe hani bubagrarok baithangni hano mwthangwi narwkna bagwi swkang jorao bihik, bwsa, takhuk-bukhuk, jaitigustino kotorkhe nukya. Tamoni hinkhe bahaikhe ha arini borokbai choba nangwi kwplai wngwi baithangni hano mwthangwi naragwi man abose bubagrarokni thani jotoni swlai kok kotor. Aboni bagwino kaisa ha bai tei kaisa hani bubagrarokni bisingo choba nanglaina hinkhe birindiyarokni sakao agini simino sakwlaijak tongmabai borok Chokdiritei Khandol akosongni chubamungbai hachwk kami amchaini muluk mulukrogo thangwi nukhungo khoroksa khwlai chwlarokno khangjago. Amohai jorarogono kwrwngsa kurungsa kami amchaio kaijaknai kwtalbo tongwi tongo. Aphuruno bubagrani dagimungbai chamari kwtal buma-buphano khulumwi ruwai sanwi salsani hamjwk kwtalno hinkheba kokbiti kholwi nogo kwlangwi chobani bagwi nokni ma nongkhorjao. Hani bagwi chobao thangmaba kwthangde kiphilno kwthwi, ahaino kosa kwthang tei kosa kwthwi wngwi wansukmung phaimarok imangbai baksa chekleklaijao. Kukubuino chobao thangnairok baksaba kwthang kiphilo tei baksa hinkhe kwthwi kiphilo, tei baksani hinkheba bwsai bwsani mang kwthwi sudano nuknani sep kwrwi wngjao. Abohai khakhamung, khahilikmung, khakuphungmung, khakakmung, khabaimung gwnang patimungrokno sakphango kwlaiwi sakni je thwi tongmano muktwi swnamsugwi kapsini kapsugwiphano khakhamwi thapwla chasukmani ulo pas paiya wngwi chobao thangwi hani bagwi thwijanai sengkwrak chamari kwtal bwsaino bihik hamjwk kwtal muitu khwlai kapmano Resiyar Khagra hinwi sinijaknai. O patimungni mangpilino swima sudano swinaini kha kuphungsaui phaio, a hamjwk kwtalni bwkha bahai wngkhwna? Haiphano, bubagrarokni bisingtwi choba khwlaiwi keboni bupha, keboni bwsa, keboni bwsai, keboni bukumui, keboni bwta, keboni buphayung, keboni buyung, keboni bumama, keboni bukhura akosongni sakni thwi yapharwi riuino arini yakni baithangni hano mwthangwi naragwi phailaikha. Phiyaba yokjak Tripura hasteo bubagra Bir Bikram Kishore Manikya thwimani ulo Tiprasarok thwngrwngni kundulo yakung khichongma jarwi baithangni achaima hano maya nangma pogwi sak nangya wngkha, hano twiwi baniya thwnglaikha, takhuk-bukhukno kusubwi baithangni nok nukhung bihik bwsa akorokno simi hamkwrai khwlaina bagwi wansugwi samung tanglaikha. Aboni bagwino paithago hinkhe baithang achaima hano kwmajagwi ha seknairoknono teisa koiwi khulumwi sanwi ma tonglaikha. Tumung hani bubagrarok haikhe wansukmaung kuthuk twiwi naharmung hakchal naharwi puila swkang baithangni achaima hano hamjagwi jesa samung khwlaina bagwi yapiri sejakkhe tabukni jorao habo tongkhamun kwmagwlak khamun, takhuk-bukhuk jaiti-gustigwrarokbo baithangni hao tongwi oroi-poroi wngwi, satok-pitok khwlaijagwi tongna nangwlak khamun. Tamoni hinkhe ha tongkhese yakung berana jaga tei buma-bupha, bihik-bwsai-bwsa, takhuk-bukhuk, mare-kiching, rang-mai, don-dulot, rangchak-richak. O kok tiniswk jora kubui.
Khursatang:
*Samarendra Chandra Debbarma, Tripura Smriti. 1927, P.211.
*Mahendra Debbarma, Yapri. 6ª April, 1967, Vol.1:1, P.3.
*Naresh Chandra Dev Varma, Kokborok Kokrubai, 2014, P.36.
*Sachlang Debbarma, Imangni Yarwng, 2024, P.17.
*Samarendra Chandra Debbarma, Tripura Smriti. 1927, P.211.
*Mahendra Debbarma, Yapri. 6ª April, 1967, Vol.1:1, P.3.
*Mahendra Debbarma, lapri. 6º April, 1967, Vol. 1:1, P.3.
*Mahendra Debbarma, Yapri. 6ª April, 1967, Vol. 1:1, P.3.
*Mahendra Debbarma, Yapri. 6th April, 1967, Vol. 1:1, P.3.