Resiyar Khagra Tamo? BA 3rd semester kokborok major paper:-6 number mari:-12
Q.Resiyar Khagra Tamo?
'Resiyar Khagra' tamo? Abono sina thangkhe puilano o kokthai thainwini kokmangno cherwi naithai kwlaio. Aroni bisingo thaisa wngkha 'Resiyar' tei thaisa kokthai wngkha 'Khagra'. Puila gosiui swina chengo, 'Resiyar' kokthaini kokmangno aswk swrai swrai wngya. Haiphano o kokthaino 'Resi' bai 'Yar' hinwi thainwikhe khagwi mano. Oro 'Yar' wngkha 'kiching' eba logisong tei puitu chawi kha berajak borok eba khachukni borok. 'Resi' kokthaini kokmang 'Risi' wngwi mano. Tamoni hinkhe kami anchaio 'resa-resi' hinwi kokthai thepaui kok salaimani khwnao. Phunukmari-'resa-resi ta wnglaidi' eba 'resa-resi kokrok ta salaidi' hinwi kok salaimarok. Oro 'Resi' eba 'Risi' kokthaino sukurubwi sanathangkhe haikhe saui mano, borokrokni sago jephuru khoroksa tei khoroksano twiwi chajagwi hamjakmung achaio aphuruno risi nangra siui thango. Kok wngkha hamjakmung tongwino risi kokthaini sinimung mano. Risi nangma wngkha puitu chajak khapangni logisongno baithangni yakni kwmaui thangna kirimung. Romdi - Khoroksa sikli tution thangmani phwrwngnaibai tinino syllabus pairiui note ribaisinai hinwi swilaiwi pailaite pailaite hor mojomo wngwi thangkha. Nogo phainani bagwi amang-chimang nangjak sikli bumano kokduk kwrwngmani ulo chukya wngwi bini hamjakma chwlanobo kokduk kwrwngkha. Phai tongo hinwi samani sokphailiya, sikli bo bini chwlani bike thok paijak sijaya. Nogo sogwi kirima sunduruma khibwi tongwina muchungmani Autobo manliya Tomtombo nukliya tei Uber booking khwlaimabo phainani silangliya. Paithago Uber booking khwlaiwi scooty khungsa phaimabai nogo sokphaiwi hama kolok rohowi manphaikha. Mohai horni jorao tei khoroksa chwla siklabai scooty kasaui phaimano lama odekni simi nugwi bini hamjakma chwlani khao risi nangwi phaikha. Abono karwi tei babaisa phasing nukhung khajak bwrwi chwlani bisingo naikhebo risi nangkaimmani mangpilino nugwi mano. Khoroksa bwsai hatio thangphuru bihikbai kwcharjagwi berma kaham paimani ulo bubachwini duma paiwi solao jaikhe dathani bermani buchu dajakliyabai nogo sokphailiya. Aboni ulo bihik bwsaino bubachwibai risi twina chengo. Nwbachwi kwcharmani hinkhe tangwi pokya? ani kweharmakhe tangwi pokjak? Phiyaba 'Resiyar' kokthaini kokmang omohai wngsukya, hinphano baithangni logisongno twiwi kwmajakna kirijakmani kaisa bwkha uburum chamung wngwi mano. 'Khagra' kokthaini kokmangno rwgwi naikhe puilano siui mano, abo wngkha bwkha kakna eba bwkha baina chengramani, atumsa himaya-tangmaya sak bai bwkha tei phola kagwi imango tongma hai wngmani. Abono karwi khagra wngkha baithangni logisong eba baithangni borok kwthang tongphano thwi thangma hai eba thwi thangphano kwthang tongma hai wngwi imangbai baksa kobonwi bwkhano methebwi manya wngwitongmani. Aro tongo khairokma, khaching khaching wngma, kha nangma, kha khamma, kha sama, kha kuphungma, kha kwlwkma, khapang swlwkma akorok. Omohai buphuru wng hinkhe, jephuru chwng khoroksa tei khoroksa siniya nuklaiya tongmani ulo sinilaiwi halok bolaiwi mare kiching wngwi jaiti gusti hinwi nok nukhung khalai thanglai phailaikhe tonglaimani, langmani logisong wngmani, bihik bwsai hinwi sinimung manmani; phiyaba swngcharni raida bojak tongmabai chwng baithangni logisongno eba jaiti gustigwrano salsaya salsa kwmajakna nango aphuruno bebakni bebak kwmaui thangbaima hai wngwi khagwra-gwra wngjago. Kok wngkha khoroksa borokni khachuk, logisong eba mare kiching akosong thwiwi thangsukyaphano, mungsaswk jorani pherbai kwmaui thangmani ulono khagwra-gwra wngo. Phiyaba lukurokni khuk bai khugo khwnao, 'Resiyar Khagra' wngkha chobao thangwi thwijanaini bihik baithangni logisong bwsaino kwmajagwi muitu khwlaiwi khapang kichigwi swlwkma-swlwkma chaui kha khamwi kapmani rwchapmungno hino. Resiyar Khagrani kukchano twiwi kwbangma elem gwnang swikwrwngrok salangkha.
(1) Elem gwnang Samarendra Chandra Debbarma samani wngkha - "Juddo-bigrohe nihoto kuno soinik puruser uddese totpotni kortik git - eirup eksrenir dukhomoy biroho-songit Tripurar parbboito prodese procholito ebong songitnichoy prayoso uitihasik gotona jorito." Kok wngkha, chobao thangwi thwijanai sengkwrakno muitu khwlaiwi bihik khakhamwi kabwi rwchapmani -omohai khakhamjak rwchapmung Tripura hasteni hachwk amchaio kwbangkukno rwchapjagwi tongo tei tamoni hinba o rwchapnung Tripura hasteni laibumabai kwrwngjak.
(ii) Nagendra Chandra Debbarma (Captain) sakha - "Horsani hamjuk kotal ma, khakamui, mokol muktui khibiui kopal buwi, bukha-buwi chirigui kabruk mani a ruchabmungno Resiyar Khagra... Kebo kebo o ruchab mungno chobani ruchab mungbo sao."
(iii) Kokbwkhal swikwrwng Naresh Chandra Dev Varma sakha "Chobao thangwi thwijanai sengkwrakno muitu khwlaiwi bihik bai rwchapjak kha-khamgwnang kaglai-rwchabmungno "Resiyar Khagra" hinwi sinijago."
(iv) Swikwtal Sachlang Debbarma sakha - "Chobao thangwi thwiwi thangjak borokno muito khaiwi khakhamwi rwchabwi kapmanino Resiyar Khagra hinu.
(v) Rwchap kwrwng Bikash Roy Debbarma Debbarma samani tongo "Resiyar Khagra wngkha thwijaknai borokno khapang swlwigwi kapmani."